कोहलपुर, बांके: कोहलपुर नगरपालिकाका नायब सुब्बा (नासु) दामोदर शर्मालाई बिदाई गरिएको छ । कोहलपुर नगरपालिकाले आज एक कार्यक्रमका बीच सेवा निवृत्त हुनु लाग्नु भएका नासु शर्मालाई बिदाई गरेको हो । उहाँ पर्सि सेवा निवृत्त हुने भएपनि भोलि शनिबार र पर्सि प्रजातन्त्र दिवस सार्वजनिक विदा परेकाले उहाँको आजै बिदाई गरिएको नगरपालिकाले जनाएको छ ।

नगर प्रमुख पूर्ण प्रसाद आचार्य, नगर उपप्रमुख संगिता सुवेदी र प्रशासकीय अधिकृत टिकाराम ढकालले शर्मालाई मायाको चिनो प्रदान गर्दै शर्माको बिदाई गर्नुभएको हो। त्यसक्रममा नगर प्रमुख आचार्यले सेवा निवृत्त हुनुभएका शर्माको बाँकी जीवन सहज, सरल र उर्जाशिल बनोस् भन्ने कामना गर्नुभयो ।

लामो समय राष्ट्रसेवक कर्मचारीका रुपमा शर्माले नागरिकलाई सेवा प्रदान गरेको स्मरण गर्दै बाँकी जीवन फलदायी बनोस् भन्ने शुभकामना दिनुभयो । शर्मा कोहलपुर निवासी नै भएकाले कोहलपुरलाई समृद्ध बनाउने सवालमा उहाँको थप सुझाव नगरपालिकाका लागि महत्त्वपूर्ण र आवश्यक हुने नगर प्रमुख आचार्यको भनाइ छ । यस्तै नगर उपप्रमुख सुवेदीले शर्माले नगरपालिकामा हुँदा इमानदार र लगनशील भयर सेवा दिएको भन्दै सेवा निवृत्त भएसँगै अबका बाँकी दिनहरु सुखमय बनोस् भन्ने कामना गर्नुभयो ।

यस्तै प्रमुख प्रशासकीय अधिकृत ढकालले शर्माले लामो समयसम्म रास्ट्रसेवकको रुपमा जनताको सेवामा आफ्नो समय खर्चिएको भन्दै नगरपालिकामा हुँदा उहाँको इमानदारिता तथा उर्जालाई सबैले मनन गर्नु पर्ने बताउनुभयो । बिदाई कार्यक्रममा शर्माले आफुले आफ्नो जागिरको दौडान इमानदार र लगनशील बनेर जनताको सेवा प्रबाह गरेको बताउनुभयो । शर्माले वि.स.२०४० साल मंसिर ५ गते मुखिया पदबाट सरकारी जागीरे सेवा सुरु गर्नुभएको थियो ।