प्रथम आईजीपी कप क्रिकेट प्रतियोगिताको उपाधि मधेश प्रदेश प्रहरी कार्यालयले जितेको छ । नेपाल प्रहरी खेलकुद समिति महाराजगञ्जको आयोजनामा मुलपानी क्रिकेट मैदानमा सञ्चालित प्रतियोगिता शनिबार मधेशले उपाधि चुमेसँगै समाप्त भएको छ ।
शनिबार भएको फाइनल खेलमा मधेश प्रदेश प्रहरी कार्यालयको टिमले लुम्बिनी प्रदेश प्रहरी कार्यालयको टिमलाई १४ रनले पराजित गरेको हो । फाइनल खेलमा पहिलो ब्याटिङ गरेको मधेश प्रदेश प्रहरी कार्यालयको टिमले निर्धारित २० ओभरमा अलआउट हुँदै १ सय ६७ रन बनायो भने जवाफी ब्याटिङ गरेको लुम्बिनी प्रदेश प्रहरी कार्यालयको टिमले २० ओभरमा ९ विकेटको क्षतिमा १ सय ५३ रन मात्र बनाउन सक्यो ।
शनिबार नै प्रतियोगिताका विजेता र उपविजेता टिमलाई पुरस्कार प्रदान गरिएको छ । प्रहरी महानिरीक्षक बसन्त बहादुर कुँवरले प्रतियोगितामा विजयी हुने मधेश प्रदेश प्रहरी कार्यालय टिमका खेलाडी तथा अफिसियललाई पदक, प्रमाण-पत्र, ट्रफी र नगद पुरस्कार प्रदान गरे । साथै, उनले सहभागी टिमका व्यवस्थापकहरूलाई मायाको चिनो समेत प्रदान गरे ।
सो अवसरमा प्रहरी महानिरीक्षक कुँवरले सुरक्षा निकायजस्तो शारीरिक र मानसिक रूपमा तन्दुरूस्त रहनुपर्ने क्षेत्रमा खेलकुदको महत्त्व अझ बढि हुने चर्चा गर्दै यस प्रतियोगिताले नेपाल प्रहरीको क्रिकेट खेलको स्तरलाई सुदृढ तुल्याउनुका साथै खेलाडीहरूको पहिचान तथा खेलको विकास र प्रवर्द्धनमा समेत योगदान पुर्याएको बताए ।
खेलाडीहरूबाट समूहमा प्रदर्शन भएको मेहनत, अनुशासन, खेलकौशल र सामूहिक भावना नेपाल प्रहरीभित्र रहेको भातृत्व भाव र स्वस्अनुशासनको प्रतिबिम्ब भएको चर्चा गर्दै प्रतियोगिताको विजेता एवम् उपविजेता तथा अन्य विधामा उत्कृष्ठ हुने सबैलाई बधाई दिए ।
कार्यक्रममा प्रहरी अतिरिक्त महानिरीक्षक टेक प्रसाद राईले निर्णायक, प्रायोजक तथा सहभागी टिमलाई प्रशंसापत्र एवं मायाको चिनो प्रदान गरे। सो अवसरमा प्रहरी अतिरिक्त महानिरीक्षक दीपक थापाले प्रतियोगिताका सर्वोत्कृष्ट खेलाडीलाई, प्राविधिक प्रहरी अतिरिक्त महानिरीक्षक डा. सुन्दर प्रसाद ह्योजुले उत्कृष्ट प्रशिक्षकलाई, प्रहरी अतिरिक्त महानिरीक्षक दुर्गा सिंहले उत्कृष्ट बलरलाई, प्रहरी अतिरिक्त महानिरीक्षक कुवेर कडायतले उत्कृष्ट ब्याट्सम्यानलाई र प्रहरी अतिरिक्त महानिरीक्षक जनक भट्टराईले फाइनल खेलका म्यान अफ दि म्याचलाई पुरस्कार प्रदान गरे ।
कार्यक्रममा नेपाल प्रहरी खेलकुद् समितिका सदस्य सचिव तथा राष्ट्रिय प्रहरी प्रशिक्षण प्रतिष्ठान महाराजगञ्जका कार्यकारी निर्देशक, प्रहरी अतिरिक्त महानिरीक्षक सुदीप गिरीले प्रतियोगितामा द्वितीय हुने लुम्बिनी प्रदेश प्रहरी कार्यालय टिमका खेलाडी तथा अफिसियलहरूलाई पदक, प्रमाण-पत्र, ट्रफी र नगद पुरस्कार प्रदान गरे ।
उनले संगठन र राष्ट्रको शीर उच्च बनाउन सफल खेलकुदको विकासका लागि नेपाल प्रहरीले पुर्याउँदै आएको योगदान अतुलनीय रहेको चर्चा गरे । प्रतियोगितामा प्रथम हुने टिमले १ लाख रूपैयाँ र द्वितीय हुने टिमले ५० हजार रूपैयाँ नगद पुरस्कार प्राप्त गरेका छन् । यसैगरी प्रतियोगिताका सर्वोत्कृष्ट खेलाडीले १५ हजार रूपैयाँ र उत्कृष्ट बलर, उत्कृष्ट ब्याट्सम्यान तथा उत्कृष्ट प्रशिक्षकले जनही १० हजार रूपैयाँ पुरस्कार प्राप्त गरेका छन् ।
