काठमाडौं: प्रत्यक्षतर्फ प्रदेशसभाको जारी मतगणनाअनुसार नेपाली कांग्रेसले ४ प्रदेशमा पहिलो स्थान हासिल गरेको छ। बागमती, गण्डकी, लुम्बिनी र कर्णाली प्रदेशमा कांग्रेसको अग्रता देखिएको छ । बागमती प्रदेशमा कांग्रेसले १८ सिटमा जित हासिल गरेको छ भने ६ सिटमा अग्रता कायमै छ । कांग्रेसको पछिपछि रहेको एमालेले ९ सिटमा जित र ४ मा अग्रता बनाएको छ ।
यस्तै गण्डकी प्रदेशमा कांग्रेसले १२ मा जित र ४ मा अग्रता बनाउँदा एमालेले १२ सिटमै जितेको छ । तर एमालेको अग्रता कुनै पनि सिटमा छैन । यस्तै लुम्बिनी प्रदेशमा कांग्रेसले १४ सिट जितिसक्दा ३ मा अग्रता कायमै छ । यस्तै एमालेले १२ सिट जितेको छ । अझै एमालेले ६ सिटमा अग्रता बनाएकाले कांग्रेसलाई पहिलो स्थान कायमै राख्न भने चुनौती छ ।
यस्तै एमालेका लागि प्रतिकुल रहेको मधेस प्रदेशमा पनि अवस्था सुधार गरेको छ। मधेस प्रदेशसभामा हालसम्म १२ सिट जितिसकेको छ भने २ मा अग्रता कायमै छ । यस्तै कांग्रेसले ११ सिट जित्दा एकमा अग्रता कायमै छ । मधेस केन्द्रीत दल जसपा र लोसपा सो प्रदेशमा क्रमशः तेस्रो र चौथो स्थानमा छन् । मधेसमा एमालेले जसपासँग तालमेल गरेको थियो ।
