कोहलपुर, बाँके : बाँकेको कोहलपुर नगरपालिका वडा नं १ ले एक सय दश जना जेष्ठ नागरिकलाई न्यानो कपडा सहित सम्मान गरेको छ । शुक्रबार वडा कार्यालयमा एक कार्यक्रमको आयोजना गर्दै वडाले ७० बर्ष भन्दा माथिका जेष्ठ नागरिकलाई न्यानो कपडा सहित सम्मान गरेको हो ।

जेष्ठ नागरिकहरुलाई कोहलपुर नगरपालिका प्रमुख पूर्ण प्रसाद आचार्य र कोहलपुर नगरपालिका वडा नं १ का वडा अध्यक्ष बद्रि प्रसाद जैसीले संयुक्त रुपमा १ सय १० जनालाई न्यानो कपडा सहित ७० बर्ष माथिका जेष्ठ नागरिकलाई सम्मान गरेका हुन । गंगा कामीको स्वागत मन्तव्यसंगै शुभारम्भ कार्यक्रममा बोल्दै नगर प्रमुख पुर्ण प्रसाद आचार्यले चिसोबाट बच्न र स्वास्थ्यको ख्याल गर्न जेष्ठ नागरिकहरुलाई अनुरोध गर्दै उनीहरुको दिर्घायुको कामना समेत गरेका थिए ।

उनले प्रत्येक वडामा धार्मिक मठ, मन्दिरको निमार्ण गरी एक आपसमा चिर परिचित भएका वृद्धाहरुलाई रमाइलो गर्नको लागि आश्रय स्थल वनाउने प्रतिबद्धता व्यक्त गरे । प्रत्येक वडाका वृद्धवृद्धाहरुलाई धार्मिक स्थलहरुको भ्रमण जानको लागि रकम समेत छुट्टयाएको आचार्यको थप कथन थियो । कार्यक्रममा कोहलपुर नगरपालिका वडा नं. १ का वडा अध्यक्ष वडा सदस्यहरु, समाजसेवी, बुद्धिजीवी लगायतको उपस्थिति रहेको थियो ।