• ४ भाद्र २०७९, शनिबार
न्याय माग्दै अनशन बसेकी निहारिका दूधे छोरासहित पक्राउ

  • टाइम्स संवाददाता

  • २० श्रावण २०७९, शुक्रबार १६:१७

काठमाडौँ: सरकारले न्यायको माग गर्दै सिंहदरबार दक्षिण ढोका अगाडि आमरण अनशनमा बसेकी निहारिका राजपुतलाई  दूधे छोरासहित पक्राउ गरेको छ ।  महोत्तरी जलेश्वर नगरपालिका ९ की निहारिकाले केही महिनादेखि नै आमरण अनशन बस्दै आएकी थिइन् ।

सरकारले यसअघि आफूसँग गरेको ५ बुँदे सहमति पालना गर्नुपर्ने माग गर्दै पछिल्लो पटक अनशनमा बसेकी थिइन । प्रहरीले सरकारद्वारा जारी प्रतिबन्धित क्षेत्रमा अनशन बसेको भन्दै शुक्रबार उनलाई पक्राउ गरेको हो । आफू १७ वर्षको छँदा नै एक व्यक्तिले नशालु पदार्थ सेवन गराएर बलात्कार गरेको भन्दै उनले दोषीमाथि कारबाही र आफूलाई न्याय हुनुपर्ने माग गर्दै आएकी छन् ।

यसअघि माइतीघर मण्डलामा छोरोलाई साथमै लिएर अनशन गरेकी निहारिकासँग सरकारले सहमति गरे पनि पालना नगर्दा उनी फेरि अनशनमा बसेकी हुन् ।यसअघि सरकारसँग भएको ५ बुँदे सहमतिपछि उनले अनशन तोडेकी थिइन्। तर उक्त सहमति पालना नगरेपछि उनी फेरि अनशनका लागि सडकमा आएकी हुन् ।

महोत्तरीकी निहारिका न्याय माग गर्दै साढे दुई वर्षदेखि काठमाडौंमा डेरा भाडामा लिएर बस्दै आएकी छन् । यसबीचमा उनले विभिन्न संघसंस्था र नागरिक अगुवाको साथ पाए पनि उनको माग पूरा हुन सकेको छैन ।

Nabintech