काठमाण्डाै: शहीद स्मारक ‘ए’ डिभिजन लिग फुटबलमा आज तीन वटा खेल हुँदैछन् । आज दशरथ रङ्गशालामा दुई वटा र च्यासल मैदानमा एउटा खेल हुनेछ ।
दशरथ रङ्गशालामा हुने खेलमा जावलाखेल युथ क्लब र एपीएफ दिउँसो साढे २ बजे खेल्दैछन् । त्यस्तै दिउँसो साढे २ बजे नै च्यासलमा नेपाल पुलिस क्लब र सङ्कटाबीच खेल हुनेछ । बेलुका साढे ५ बजे दशरथ रङ्गशालामा फ्रेड्स क्लब र सातदोबाटोबीच खेल हुनेछ ।
लिगमा हिजोदेखि तेस्रो चरणका खेल सुरु भएका हुन् । यस सिजनको ‘ए’ डिभिजन लिग डबल राउण्ड रोबिनको आधारमा भइरहेको छ । यस पटकको लिगमा कुल १ सय ८२ खेल हुनेछन् । यस पटकको लिग विजेताले ७५ लाख, दोस्रो टोलीले ५० लाख र तेस्रो हुने टोलीले २५ लाख रुपैयाँ पाउनेछन् ।
