३१ असार २०८१, आईतवार
ब्रिनोजको गेटमा ताला लगाएर साधारणसभा

ब्रिनोजको अबैधानिक साधारणसभा मान्य नहुने सचेत नागरिक समाज


  • टाइम्स संवाददाता

  • ९ बैशाख २०८०, शनिबार २०:५८

नेपालगन्ज: नेपालगन्जमा रहेको ब्रिनोज कान स्वास्थ्य स्याहार केन्द्रको गेटमा विरोध प्रदर्शन भएको छ । अस्पताल व्यवस्थापन समितिले गोप्य रुपमा साधारणसभा तथा अबिधेशन गर्न लागेको भन्दै सचेत नागरिक समाजले गेटमा विरोध प्रदर्शन गरेको हो । १३ औं बार्षिक साधारणसभा तथा जिल्ला अधिवेशन अस्पताल व्यवस्थापन समितिले शनिवार आयोजना गरेको थियो । अबैधानिक तरिकाले संचालन गरेको बार्षिक साधारणसभा मान्य नहुने भन्दै गेटमा विरोध प्रदर्शन गरिएको समाजसेवी डम्मर बिसीले बताए ।

विवादका कारण जिल्ला प्रशासन कार्यालय बाँकेमा केही दिन पहिले छलफल भई छानविन समिति बनेको थियो । छानविन समितिले प्रतिवेदन नबुझाउदै मनोमानी तरिकाले साधारणसभा गरेपछि विरोध प्रदर्शन गर्न बाध्य भएको विसीले बताए । विधान विपरित कार्य गर्दै आएको व्रिनोजले मनोमानी ढंगले सदस्यता वितरण गर्नु र साधारणसभा पनि जानकारी नगराई गोप्य तरिकाले आयोजना गरेको हुनाले खुल्ला रुपमा आम जनताका विच साधारणसभा गर्नुपर्ने माग गर्दै विरोध गरिएको उहाँले जानकारी गराए ।

अस्पताल कसैको व्यक्तिगत पेवा होईन यो जनताको लागि बनाईएको सार्वजनिक सम्पत्ती हो । यसको बिधिवत तरिकाले साधारणसभा गरेर पदाधिकारी चयन गर्नु पर्छ, बर्तमान समितिलाई भंग गर्नुपर्ने, कर्मचारीको हकहित र संरक्षण गर्नुपर्ने, अस्पतालको समग्र विकासको लागि नियमसंगत योग्य व्यक्तिलाई प्रतिनिधित्व हुने गरि कार्यसमिति बनाउनुपर्ने जस्ता मागहरु सम्बोधन गर्न तालाबन्दि समेत गरेको अस्पतालका पुर्व कार्यकारी प्रमुख पुरण थारुको भनाई रहेको छ ।

संस्थाको बिधान २०६५ बमोजिम संस्था सञ्चालनमा नआएको, नबिकरणका लागि कागजी रुपमा साधारण सभा गर्दै आएको, स्थापनाकाल देखि हालसम्म एउटै कार्य समिति रहेको, संस्थामा साधारण सदस्यता कसैलाई नदिएको, बिधान बमोजिम कुनै पनि ऐन, नियमावलीहरु नबनाएको, संस्थाको नाममा रहेको एल्बुलेन्स संस्थाका अध्यक्षले चरम रुपमा व्यक्तिगत कामका लागि प्रयोग गरेको लगायतका बिषयलाई सुधारन्मुख गरि संस्थाको गरिमालाई जोगाउन अस्पताल विरुद्ध उत्रिएको अस्पतालका पुर्वकार्यकारी प्रमुख थारुले बताए ।

साधारणसभामा स्थानियवासीलाई समेत प्रवेशमा रोक लगाई मनोमानी ढंगले साधारणसभा गरेको मान्य नहुने भन्दै विरोध प्रदर्शन अझ चर्काउने थारुले चेतावनी दिएका छन । विवाद चलेपछि साधारणसभा विरोधका विचमा पनि संचालन भएपनि अबिधेशन चाही हुन सकेन । यस विषयमा अस्पताल व्यवस्थापन समितिका अध्यक्ष विमल कुमार टण्डनले पुरण थारुले अस्पतालको बदनाम गर्न अनेक कार्य गर्दै आएको बताए । पुरण थारु सिईओ आफै हुँदा अस्पताललाई व्यवस्थित गर्ने दायित्व उनकै रहेको उहाँले बताए ।

पुरणले आफ्नो दायित्व पुरा गर्न सकेनन त्यसको विरुद्ध आफै लागे अध्यक्ष टण्डनले भने । पुरणलाई स्पष्टिकरण माग्दा नदिएपछि निलम्बित गरेपछि बाध्यतावस हटाउन बाध्य भएको अध्यक्ष टण्डनले भने । साधारणसभा विथोल्नका लागि उनिहरुले गेटमा ताल्चा समेत लगाए पछि ताला खोल्न प्रशासन गुहारेको अध्यक्ष टण्डनले बताए । हामीले नियम संगत अस्पतालको बचाउन गर्न बहुमतका साथ कार्य गर्दै आएको उनको कथन छ ।

Nabintech