नेपालगञ्ज : बाँकेको नेपालगञ्ज रङ्गशालामा निर्माण गरिएको ‘सेन्थेटिक ट्र्याक’ एक महिनामै उप्किएको छ । राष्ट्रिय खेलकुद परिषद् (राखेप) ले नेपालगञ्ज रङ्गशालामा ‘सेन्थेटिक ट्र्याक’ निर्माण गर्न ठेकेदार कम्पनी पञ्चकन्या साइनकोट्स जेभी ललितपुरलाई ठेक्का दिएको थियो । निरन्तरको वर्षासँगै ‘सेन्थेटिक ट्र्याक’ उप्किएपछि स्थानीयवासीले गुणस्तरमाथि प्रश्न उठाएका छन् ।

नेपालगञ्ज उद्योग वाणिज्य सङ्घका पूर्वअध्यक्ष एवम् नागरिक अगुवा कृष्णप्रसाद श्रेष्ठले उप्किएको ‘सेन्थेटिक ट्र्याक’ को गुणस्तरबारे छानबिन गर्नुपर्ने माग गर्नुभयो । ठेकेदार कम्पनीले यो ट्र्याक राखेपलाई हस्तान्तरण गर्न बाँकी छ ।

राखेपले सन् २०२३ मार्च २३ मा यो ‘सेन्थेटिक ट्र्याक’ निर्माण गर्न नौ करोड ८६ लाख ४० हजार रुपैयाँमा ठेक्का सम्झौता गरेको थियो । ठेकेदार कम्पनीले सन् २०२४ जनवरी ५ मा काम सम्पन्न गरिसक्नुपर्ने थियो तर उसले गएको असार मसान्तमा मात्र काम सम्पन्न गरेको हो ।