कपिलबस्तु- कपिलबस्तुको मायादेवी गाँउपालिका –६ डुमराबाट प्रहरीले एक जनालाई पेस्तोलसहित पक्राउ गरेको छ । पक्राउ पर्नेमा सोही वडाका बडसुडवा बस्ने नाजिर फकिरको २१ व्र्षिय छोरा सद्दाम हुसेन फकिर रहेको प्रहरीले जनाएको छ ।  जिल्ला प्रहरी कार्यालय कपिलबस्तुका प्रहरी नायब उपरीक्षक मोहनमणि अधिकारीका अनुसार फकिरले मोटरसाइकल चोरी गरिरहेको स्थानीयद्वारा खबर हुनासाथ इलाका प्रहरी कार्यालय पकडीबाट खटेका प्रहरीले नियन्त्रणमा लिएको जनाएको छ ।

फकिरलाई नियन्त्रणमा लिई खानतलासी गर्ने क्रममा उनको शरीरमा कम्मरको भागमा लुकाइछिपाई राखेको कालो रङ्गको ४।५ मिलिमिटर क्यालिवरको डेन्जर टोय इयर पेस्तोल १ थान, पेस्तोलमा लाग्ने छर्रा ४३ थान, पेस्तोलमा प्रयोग हुने धमाका ६ थान, आइटेल कम्पनीको मोबाइल १ थान र एक थान सिमकार्डसहित नियन्त्रणमा लिइएको उहाँले बताउनुभयो ।

उनलाई हातहतियार तथा खरखजानासम्बन्धी कसुर मुद्दामा थप अनुसन्धान भइरहेको प्रहरीले जनाएको छ ।