नेकपा एमाले शिक्षा तथा मानव श्रोत विभाग बाकेले शिक्षा क्षेत्रलाई उच्च प्राथमिकता दिएर आगामी आर्थिक वर्ष ०८२/०८३ का लागि बजेट विनियोजन गर्न स्थानीय तहको ध्यानाकर्षण गराएको छ।

बिभागले मंगलवार कोहलपुर नगरपालिका र राप्तीसोनारी गाउँपालिकामा ध्यानाकर्षणपत्र बुझाउँदै उक्त माग गरेको जनाएको छ। विभागका बाँके प्रमुख सूर्य रोकायले विद्यालयको भौतिक तथा शैक्षिक गुणस्तर वृद्धिका लागि स्थानीय पालिकालाई ध्यानाकर्षण गराइएको कोहलपुर टाइम्सलाइ जानकारी दिए । पर्याप्त स्वच्छ खानेपानी र शौचालयको व्यवस्थापन हुनुपर्ने, फर्निचर तथा खेल सामग्रीको व्यवस्थापन, टिनको पाता विस्थापन , विपद जोखिम न्यूनीकरणमा प्राथमिकता तथा पर्याप्त खेल मैदानको व्यवस्थापनमा समेत बजेट छुट्ट्याउन ध्यानाकर्षण गराइएको छ । सरकारी विद्यालयमा प्रविधिमा आधारित शिक्षाको व्यवस्थापन गर्न पनि ध्यानाकर्षणपत्रमा माग गरिएको उनले रोकायले बताए ।

ध्यानाकर्षणपत्र बुझ्दै कोहलपुर नगरपालिकाका प्रमुख पूर्ण प्रसाद आचार्यले विभागले महत्वपूर्ण विषय सही समयमा उठाएको भन्दै पालिकाले शैक्षिक गुणस्तर सुधार र पूर्वाधार विकासमा प्राथमिकता दिएको बताए ।

यस्तै राप्तीसोनारी गाउँपालिकाका अध्यक्ष तप्त बहादुर पौडेलले पनि बजेट तथा नीति निर्माण गर्दा विभागले उठाएका उचित विषयहरुलाई समेटिने प्रतिवद्धता जनाए ।