नेपाली क्रिकेटको इतिहासमा एउटा ठूलो र ऐतिहासिक सफलता हात लागेको छ । नेपाल क्रिकेट संघ ‘क्यान’ ले आयोजना गर्ने नेपाल प्रिमियर लिग ‘एनपीएल’ लाई विश्व क्रिकेटको सर्वोच्च निकाय अन्तर्राष्ट्रिय क्रिकेट परिषद् ‘आइसीसी’ ले औपचारिक रूपमा मान्यता प्रदान गर्यो ।

क्यानका सचिव पारस खड्काले शुक्रबार एक प्रेस विज्ञप्ति जारी गर्दै आईसीसीले एनपीएललाई आधिकारिक मान्यता दिएको जानकारी गराएका छन् । यो मान्यतासँगै नेपाली क्रिकेटले विश्वव्यापी रूपमा नयाँ उचाइ लिने विश्वास गरिएको छ । यद्यपि आइसीसीबाट लिगलाई कुनै प्राविधिक वा आर्थिक सहयोग मिल्ने भने होइन ।

आईसीसीको मान्यताको अर्थ

सजिलो भाषामा भन्नुपर्दा आईसीसीको मान्यता पाउनु भनेको नेपाल प्रिमियर लिगले विश्व क्रिकेटको नियम, मापदण्ड र वैधानिकता भित्र रहेर खेलिने आधिकारिक प्रतियोगिताको दर्जा पाउनु हो ।

यसका मुख्य अर्थहरू निम्न छन्ः

–आधिकारिक टी–२० को दर्जाः यो मान्यतासँगै एनपीएलले औपचारिक रूपमा आधिकारिक टी–२० लिगको रूपमा स्थान पाएको छ ।

–करियर रेकर्डमा गणनाः अब एनपीएलमा खेलाडीहरूले बनाउने रन, लिने विकेट वा गर्ने अन्य प्रदर्शनहरू उनीहरूको आधिकारिक घरेलु तथा अन्तर्राष्ट्रिय टी–२० करियरको तथ्याङ्कमा जोडिनेछन् ।

–खेलाडी कोटा फुकुवाः यसअघि आईसीसीको पूर्ण स्वीकृति नहुँदा विदेशी टेस्ट राष्ट्रका सक्रिय खेलाडीहरू ल्याउन विभिन्न सीमाहरू थिए । अब पूर्ण मान्यता पाएसँगै ती सीमाहरू हटेका छन् । फ्रेन्चाइज टोलीहरूले आवश्यकता अनुसार टेस्ट राष्ट्रका सक्रिय स्टार खेलाडीहरूलाई सहजै अनुबन्ध गर्न पाउनेछन् ।

नेपाली क्रिकेटलाई अन्य फाइदा
आइसीसीको यो ऐतिहासिक निर्णयबाट नेपाली क्रिकेटको समग्र विकास, अर्थतन्त्र र खेलाडीहरूको स्तरमा बहुआयामिक फाइदा पुग्ने देखिन्छ । विश्वस्तरीय स्टार खेलाडीहरूको आगमनः आईसीसीको औपचारिक स्वीकृतिका कारण अब विश्व क्रिकेटका स्थापित र चर्चित स्टार खेलाडीहरू नेपाल आउन कानुनी र प्राविधिक रूपमा बाटो खुलेको छ । डेभिड वार्नर, मोइन अली, सिकन्दर राजाजस्ता दिग्गज खेलाडीहरू एनपीएलमा जोडिइसकेका छन् । अब थप स्टार खेलाडी ल्याउने बाटो खुलेको छ । यसले लिगको स्तर निकै माथि लैजानेछ ।

नेपाली युवा प्रतिभाले एक्स्पोजर पाउनेः नेपाली घरेलु खेलाडीहरूले विश्वका उत्कृष्ट बलर र ब्याटरहरूसँग एउटै ड्रेसिङ रुम सेयर गर्ने र मैदानमा प्रतिस्पर्धा गर्ने अवसर पाउनेछन् । यसले हाम्रा युवा खेलाडीहरूको मनोबल, खेल कौशल र अनुभवमा तीव्र सुधार ल्याउनेछ ।

डीआरएसको प्रयोगः आईसीसीको मान्यता पाएसँगै एनपीएलमा डिसिजन रिभ्यु सिस्टमु ‘डीआरएस’ जस्ता अत्याधुनिक प्रविधि लागू गर्न थप सहज र आधिकारिक हुनेछ, जसले नेपाली क्रिकेटको पूर्वाधार र प्रविधिलाई आधुनिक बनाउनेछ ।

वैश्विक पहिचान र व्यापारिक लाभः एनपीएलको विश्वव्यापी प्रसारण र अन्तर्राष्ट्रिय चर्चा बढ्दा नेपालको खेलकुद पर्यटनमा टेवा पुग्नेछ । साथै, लिगको व्यावसायिक मूल्य बढ्दा स्पोन्सरसिप, लगानी र क्रिकेटको अर्थतन्त्रमा ठूलो विकास हुनेछ ।

अन्तर्राष्ट्रिय सम्बन्ध र विश्वासः विगतका केही घरेलु लिगहरूमा भएका विवादका कारण गुमेको साखलाई यो आधिकारिकताले सच्याएको छ । नेपालले पारदर्शी, सुरक्षित र व्यवस्थित रूपमा ठूला लिगहरू आयोजना गर्न सक्छ भन्ने सन्देश विश्वभरि गएको छ ।

निष्कर्षमा, एनपीएलले आईसीसीबाट पाएको यो आधिकारिक मान्यता नेपाली क्रिकेटलाई एउटा नयाँ युगमा प्रवेश गराउने प्रवेशद्वार । आगामी अक्टोबर २६ देखि सुरु हुने एनपीएलले नेपाली क्रिकेट फ्यानहरूलाई मात्र नभई विश्व क्रिकेटकै ध्यान नेपालतर्फ आकर्षित गर्ने निश्चित छ ।