सुर्खेत : आइतबार वीरेन्द्रनगरमा बसको ठक्करबाट मृत्यु भएकी वृद्ध महिलाका आफन्त सोमबार बिहानैदेखि आन्दोलनमा उत्रिएका छन् । विभिन्न माग राख्दै आफन्तहरू आन्दोलनमा उत्रिएका हुन् ।

आज बिहानैदेखि पुनः आन्दोलनमा उत्रिएका आफन्तको माग भनेको ‘आफन्तलाई नसोधेर नै किन लास उठाइयो’ भन्ने छ । साथै उचित क्षतिपूर्ति र सवारी चालकलाई हदैसम्मको कारबाहीको माग राख्दै अहिले एरिचोक, बसपार्क अगाडी, मंगलगढी चोक, एयरपोर्ट चोकमा टायर बालेर सडक अवरुद्ध गरिरहेका छन् ।

आन्दोलनका कारण प्रदेश राजधानी वीरेन्द्रनगरमा चल्ने सवारी साधनहरू ठप्प भएका छन् । छिटपुट मोटरसाइकल बाहेकका अन्य सवारी साधनहरू ठप्प भएका हुन् । जिल्ला प्रहरी कार्यालयका डिएसपी शाहीका अनुसार बस चालक फरार रहेका छन् भने बसलाई नियन्त्रणमा लिएर राखिएको छ । फरार बस चालकको खोजी कार्य भइरहेको उनले बताए ।