नेपालगञ्ज : नेपालगञ्ज नाकाबाट पेट्रोलियम पदार्थको आयात घटेको छ। भन्सार कार्यालय नेपालगञ्जको तथ्याङ्क अनुसार गत वर्षभन्दा चालु आर्थिक वर्षको वैशाखसम्म नेपालगन्ज नाका हुँदै आयात हुने वस्तुको सूचीमा सबैभन्दामाथि रहँदै आएको पेट्रोलियम पदार्थको आयात घटेको छ।
पछिल्लो १० महिनाको तथ्याङ्कअनुसार नेपालगञ्ज नाका हुँदै भारतबाट १२ अर्ब ९६ करोड १० लाख रुपैयाँ बराबरको एक लाख आठ हजार तीन सय २८ किलोलिटर डिजल आयात भएको छ। डिजल आयातबाट कार्यालयलाई ४ अर्ब ६२ करोड २९ लाख रुपैयाँ राजस्व प्राप्त भएको नेपालगन्ज भन्सार कार्यालयका भन्सार अधिकृत डिल्लुप्रसाद शर्माले जानकारी दिए।
गत वर्ष सो अवधिमा १३ अर्ब ११ करोड तीन लाख रुपैयाँ बराबरको एक लाख ४१ हजार पाँच सय २८ किलोलिटर डिजल आयात भएको थियो। यसबाट कार्यालयले पाँच अर्ब ५४ करोड २७ लाख राजस्व असुल गरेको थियो। वैशाखसम्म तीन अर्ब ८६ करोड ९७ लाख ८४ हजार रुपैयाँ मूल्य बराबरको ३८ हजार आठ सय ७६ किलोलिटर पेट्रोल आयात भएको छ। यसबाट दुई अर्ब २२ करोड ५२ लाख राजस्व असुली भएको छ।
गत वर्षको सोही अवधिमा चार अर्ब चार करोड २९ लाख बराबरको ४४ हजार नौ सय ७६ किलोलिटर पेट्रोल आयात भएको थियो। उक्त पेट्रोल आयात हुँदा दुई अर्ब ५१ करोड ७९ लाख राजस्व असुली भएको छ।
त्यस्तै तीन अर्ब ९५ करोड ८२ लाख रुपैयाँ बराबरको तीन करोड ४८ लाख ९८ हजार किलो एलपी ग्यास आयात भएकामा गत वर्ष चार अर्ब २६ करोड ८२ लाख बराबरको तीन करोड ६९ लाख दुई हजार छ सय ७० किलो एलपी ग्यास आयात भएको शर्माले बताए।
अधिकृत शर्माका अनुसार वैशाखसम्म गत वर्षभन्दा ६३ करोड २४ लाख बराबरको डिजेल, पेट्रोल र एलपी ग्यास आयात घटेको छ भने गत आर्थिक वर्षभन्दा करिब एक अर्ब २७ करोड तीन लाख कम राजस्व सङ्कलन भएको छ। एलपी ग्यास आयातबाट गत वर्ष ७९ करोड ६१ लाख राजस्व असुली हुँदा चालु आर्थिक वर्षमा ७३ करोड ८३ लाख २६ हजार मात्र राजस्व असुली भएको छ।
कार्यालयले गत आर्थिक वर्षको भन्दा रु ७१ करोड ५५ लाख कम राजस्व सङ्कलन भएको जनाएको छ। गत आर्थिक वर्षको वैशाखसम्म रु दुई अर्ब ८४ करोड ४५ लाख बराबरको पाँच करोड ५१ लाख ४३ हजार किलो चिनी आयात गरेको थियो। यसबाट कार्यालयलाई रु एक अर्ब ६१ करोड चार लाख राजस्व असुली भएको थियो।
चालु आर्थिक वर्षको १० महिनामा एक अर्ब ५७ करोड ६६ लाख बराबरको दुई करोड ६२ लाख ९४ हजार ९८७ किलोग्राम चिनी आयात गरेको थियो। यसबाट कार्यालयलाई ८९ करोड ४९ लाख ५९ हजार राजस्व प्राप्त भएको छ।
गत आर्थिक वर्षको वैशाखसम्म आठ अर्ब ३७ करोड ७१ लाख रुपैयाँ बराबरको १४ करोड ७५ लाख चार हजार ७६० किलोग्राम चामल आयात भएको थियो।
