दाङ – दाङमा जारी प्रधानमन्त्री कप एकदिवसीय पुरुष क्रिकेट प्रतियोगितामा शुक्रबार भएको खेलमा विभागीय टीम नेपाल पुलिस क्लबले एपीएफ क्लबलाई दुई विकेटले पराजित गरेको छ। लमहीस्थित देउखुरी अन्तर्राष्ट्रिय क्रिकेट रंगशालामा एपीएफ क्लबले दिएको ९५ रनको लक्ष्य पुलिस क्लबले २६।२ ओभरमा ८ विकेटको क्षतिमा पूरा गर्यो।
सामान्य लक्ष्य पछ्याएको पुलिसले जित निकाल्न संघर्ष गर्यो। ८ विकेट गुमाइसकेका अवस्था दबाबमा पुरेको पुलिस क्लबलाई गुल्सन झाले चौका प्रहार गर्दै जित दिलाए। गुल्सनले २ चौकासहित अविजित १२ रन बनाए। कुशल भुर्तेलले २ चौकासहित ३१ रन बनाउँदा अर्जुन साउदले ११ रन, रासिद खानले १० रनको योगदान दिए।
एपीएफका लागि भुवन कार्कीले ७ ओभरमा ३ मेडनसहित ३३ रन खर्चेर ३ विकेट लिए। यसैगरी, कप्तान रोहित पौडेल र अभिशेष गौतमले समान २(२ विकेट लिए। कमल ऐरीको नाममा १ विकेट रह्यो। टस जितेर पहिले ब्याटिङ गरेको एपीएफ क्लब २७।४ ओभरमा अलआउट हुँदै ९४ रन बनायो। नेपाल पुलिस क्लबका ललित नारायण राजवंशीले महत्त्वपूर्ण ६ विकेट लिएपछि एपीएफ ९४ रनमा समेटिएको थियो।
ललितले ७ दशमलव ४ ओभरमा जम्मा १८ रन खर्चेर ३ मेडनसहित ६ विकेट लिएपछि एपीएफको टीम सस्तैमा समेटियो। एपीएफका लागि लोकेश बमले २२ रन, आसिफ शेखले १८ रन, सन्दीप जोराले २६ रन, अमर रौतेलाले १० रन जोड्नुबाहेक अरु खेलाडी क्रिजमा टिक्न सकेनन्।
ललितले आसिफ शेख, सन्दीप जोरा, सुमित महर्जन, भुवन कार्की, कमलसिंह ऐरी र अभिशेष गौतमलाई सिकार बनाउँदै ६ विकेट लिँदा सागर ढकाल, करण केसी, गुल्सन झा, कुशल भुर्तेलले समान १/१ विकेट लिए। पुलिसको जितमा ६ विकेट लिएका ललितनारायण राजवंशी प्लेयर अफ द म्याच भए।
