नेकपा एकीकृत समाजवादीका पोलिटब्युरो सदस्य अशोक कोइरालाको निधन भएको छ । कोइरालाको सोमबार भैरहवास्थित मेडिकल कलेजमा उपचारका क्रममा निधन भएको हो । तीन साताअघि पार्टीको कामको सिलसिलामा कपिलवस्तु रहेका समयमा कोइरालालाई मस्तिष्कघात भएको थियो ।
कोइराला माओवादी-एमाले एकता अघि एमाले बाँकेका अध्यक्षसमेत थिए । विद्यार्थी आन्दोलनबाट राजनीतिमा आएका कोइराला महेन्द्र बहुमुखी क्याम्पस, नेपालगञ्जको स्ववियु सभापति पनि भएका थिए । एमाले विभाजनपछि भने कोइराला माधवकुमार नेपाल नेतृत्वको नेकपा एसतिर लागेका थिए । कोइरालाका एक छोरा र एक छोरी छन् । स्वर्गीय कोइरालाको मंगलबार (भोलि) अन्तिम संस्कार गरिने पारिवारिक स्रोतले जनाएको छ ।
