जुम्ला: जुम्लामा यो वर्ष स्याउ उत्पादनमा वृद्धि भएको छ । जिल्ला कृषि कार्यालय जुम्लाका प्रमुख गणेश अधिकारीका अनुसार चालू आर्थिक वर्षमा १८ हजार मेट्रिकटन स्याउ उत्पादन भएको हो । गत आर्थिक वर्षमा १२ हजार मेट्रिकटन स्याउ उत्पादन भएको थियो ।
स्याउ उत्पादन बढे पनि किसानले उचित मूल्य नपाउँदा चिन्तित देखिन्छन् । हाल उत्पादित १८ हजार मेट्रिकटनमध्ये ९ हजार मेट्रिकटन स्याउ नेपालगञ्ज लगायतका बजारमा पठाइएको छ । तर स्याउले उचित मूल्य नपाएको किसानहरूको गुनासो छ। व्यवसायीहरुले मौसममा प्रतिकेजी ५० देखि ५५ मा स्याउ खरिद गरी प्रतिकेजी ६७ देखि ७० मा बिक्री गर्दै आएका थिए । तर अहिले किसानहरू त्यो भन्दा निकै कम मूल्यमा स्याउ बिक्री गर्न बाध्य भएको बताउँछन् ।
सिंजा गाउँपालिका ६ स्याउ व्यापारी रामबहादुर रावतले जुम्लाको स्याउ सुर्खेत, नेपालगञ्ज, दाङ, बुटवल, नारायणगढ र काठमाडौंसम्म पुर्याए पनि उचित बजार मूल्य नपाएको गुनासो गरे । उनले प्रतिकेजी ६० मा नेपालगन्जमा स्याउ खरिद गरे पनि प्रतिकेजी ३० मा बिक्री गर्न बाध्य भएको बताए। कोहलपुरमा शीत भण्डार नहुँदा स्याउको सुरक्षा हुन नसकेको र कुहिन दिनुभन्दा सस्तो भए पनि बेच्नैपर्ने बाध्यता भएको उनले बताए ।
